Sin il suandant portal da survista chattais Vus tut ils purschiders dal DEP ch'èn certifitgads cun lur indicaziuns las pli impurtantas, per che Vus possias As decider per in purschider. Ulteriuras infurmaziuns e sustegn survegnis Vus per part er tar las organisaziuns da pazients, tar las lias da sanadad u tar persunas spezialisadas dal sectur da sanadad.

Tut tenor purschider dal DEP èsi pussaivel da far in dossier en moda digitala e/u fisica en in ospital, in'apoteca u in post public (p.ex tar la Posta). Questas indicaziuns chattais Vus medemamain en il suandant portal da survista.

Per avair in access segir al DEP duvrais Vus ina identitad electronica certifitgada. Co che Vus survegnis quella, dependa dal purschider dal DEP. Tar intgins capita quai en il medem pass sco l'avertura dal DEP. Sin la pagina da survista dals purschiders da meds d'identificaziun pudais Vus eruir tge purschiders ch'èn certifitgads tenor la Lescha federala davart il dossier electronic dal pazient. Ulteriuras infurmaziuns davart las identitads electronicas che vegnan acceptadas da purschiders dal DEP chattais Vus sin las paginas d’internet da quels.

Per pudair avrir in DEP stuais Vus sco emprim dar Voss consentiment en scrit u digitalmain. Il consentiment è mo valaivel, sche Vus essas vegnì infurmà detagliadamain davart il DEP e sias reglas.

Per avrir in DEP stuais Vus As identifitgar e duvrais in document d'identitad da la glista suandanta:

• pass svizzer
• carta d'identitad svizra
• documents d'identitad B, C, Ci, F*, G, L, N*, S*
• tut las cartas da legitimaziun ch'il Departament federal d'affars exteriurs (DFAE) ha emess.

Plinavant è il numer da la AVS necessari per che Vus possias retschaiver in numer d'identificaziun da pazient univoc. Voss numer da la AVS chattais Vus sin la carta d'assicuranza svizra. Sche Vus n'avais nagin numer da la AVS, po il purschider dal DEP pretender in per Vus.

Ussa pudais Vus As annunziar en Voss DEP en il portal d'access da Voss purschider dal DEP. En il DEP pudais Vus tschertgar Vossas persunas spezialisadas dal sectur da sanadad e conceder a quellas dretgs d'access, administrar Voss documents e deponer agens documents en il DEP.