Il dossier electronic dal pazient (DEP) è ina collecziun da documents persunals cun infurmaziuns davart Vossa sanadad.

Quai èn per exempel il rapport da sortida d'in ospital, il rapport da tgira da la Spitex, la glista da medicaziun, diagnosas radiograficas u l'attest da vaccinaziun. Sur ina colliaziun d'internet segira pudais Vus sco er Vossas persunas spezialisadas dal sectur da sanadad consultar questas infurmaziuns da tut temp: sin il computer, sin il smartphone, a chasa u cur che Vus essas en gir. Vus fixais sezza/sez, tgi che dastga consultar tge documents e cura. Las infurmaziuns medicinalas en il DEP tutgan a Vus. Vus decidais, tge che capita cun ellas.

Ed en cas d'urgenza èn infurmaziuns impurtantas disponiblas svelt, er sche Vus n'essas betg pledentabla/pledentabel.

Tut las persunas en Svizra pon far in DEP. Il DEP è facultativ e gratuit e po puspè vegnir serrà da tut temp. Er sch'el vegn numnà «dossier dal pazient»: per avrir in DEP na ston ins betg esser malsauna u malsaun. Er ina persuna sauna po avrir in DEP. Per las persunas en Svizra è il DEP facultativ e gratuit.

Obligatoric per las instituziuns che porschan tractaments staziunars e per las praticas da medi che han survegnì l'admissiun a partir dal 2022

Ils ospitals acuts, las clinicas da reabilitaziun, las clinicas psichiatricas, las chasas da tgira e las chasas da parturir sco er las praticas da medi ch'èn vegnidas admessas da nov a partir dal 2022, èn obligads da s'affiliar al DEP.

Facultativ per autras persunas spezialisadas dal sectur da sanadad e per la populaziun

Las persunas spezialisadas dal sectur da sanadad sco p.ex. las medias ed ils medis ch'èn vegnids admess avant il 2022, apotecras ed apotechers, purschiders da servetschs da Spitex u fisioterapeutas e fisioterapeuts pon s'affiliar facultativamain al DEP.

Persunas ed organisaziuns che n'èn betg participadas al tractament da pazientas e pazients n'han nagin access al DEP. Uschia n'han er las patrunas ed ils patruns, las autoritads, las assicuranzas da malsauns, las assicuranzas supplementaras u las assicuranzas da vita nagin access al DEP. Er la media u il medi da confidenza d'ina cassa da malsauns n'ha nagina invista dals documents arcunads en il DEP.